२०११ च्या भारतीय जनगणनेनुसार कवाडा गावात सुमारे ६०० कुटुंबे राहतात. एकूण सुमारे 3127 च्या आसपास लोकसंख्या असून पुरुष व महिलांचे प्रमाण जवळपास समसमान आहे. गावातील लोकसंख्येमध्ये प्रामुख्याने आदिवासी (वारली, कोकणा इ.) व कुणबी समाजातील लोक राहतात. शेती हा गावाचा मुख्य व्यवसाय असून भात, नागली, वरई व भाजीपाला पिकवला जातो. काही लोक शेतमजुरी, वीटभट्टी, बांधकाम तसेच औद्योगिक क्षेत्रात काम करतात. महिलांमध्ये स्वयं-सहायता गटांच्या माध्यमातून बचत गट व लघुउद्योगही चालवले जातात.

पावसाळ्याच्या दिवसांत गाव परिसरात निसर्गसौंदर्य खुलून येते. श्रावण महिन्यात डोंगरदऱ्यांमध्ये व शेतजमिनीत विविध रानभाज्या उगवतात. विशेषतः अळंबी (रानमशरूम) मोठ्या प्रमाणात आढळते. पहाटे लवकर आदिवासी बांधव रानात जाऊन अळंबी गोळा करतात. ही भाजी ताजी असतानाच विक्रीसाठी बाजारात नेली जाते, कारण उशीर झाल्यास ती फुलून खाण्यास अयोग्य होते. पावसाळ्यात अळंबी व इतर रानभाज्यांच्या विक्रीमुळे गावातील कुटुंबांना अल्पकालीन उत्पन्नाचा स्रोत उपलब्ध होतो.

गावात प्राथमिक शाळा, अंगणवाडी, ग्रामपंचायत कार्यालय तसेच मूलभूत पाणी व वीज सुविधा उपलब्ध आहेत. रस्ते व इतर विकासकामे ग्रामपंचायत व जिल्हा परिषद यांच्या माध्यमातून हळूहळू सुधारली जात आहेत. गावातील लोक परंपरा, सण-उत्सव आणि सामाजिक एकात्मता जपत आधुनिकतेकडे वाटचाल करत आहेत.